កូរ៉េខាងជើង៖ កងទ័ពកូរ៉េខាងជើងអះអាងថា ខ្លួននឹងកាត់ផ្តាច់ផ្លូវ និងផ្លូវដែកដែលតភ្ជាប់ទៅកូរ៉េខាងត្បូងទាំងស្រុង ដោយចាប់ផ្តើមពីថ្ងៃពុធ ទី០៩ ខែតុលានេះ និងងាកទៅពង្រឹងនៅតំបន់ម្ខាងទៀតនៃព្រំដែនរបស់ខ្លួន។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋកូរ៉េខាងជើង KCNA។

សេចក្តីប្រកាសនេះបានបង្ហាញបន្ថែមនូវការកើនឡើងកាន់តែខ្លាំងជុំវិញសកម្មភាពាក់ព័ន្ធនឹងព្រំដែនដែលបែងចែកបងប្អូនកូរ៉េទាំងពីរ ដែលគេកម្រឃើញមានការលើកឡើងណាមួយជុំវិញបញ្ហាក្បែរតំបន់ព្រំដែនរវាងប្រទេសទាំងពីរណាស់។

បើតាមការអះអាងរបស់យោធាកូរ៉េខាងត្បូងកាលពីខែកក្កដាឱ្យដឹងថា កូរ៉េខាងជើងបាននឹងកំពុងដាក់ពង្រាយគ្រាប់មីន និងដំឡើងរបាំងការពារ និងបង្កើតឱ្យមានទីតាំងដីខូចខាត ព្រមទាំងបង្កើនកម្លាំងទ័ពកាន់តែខ្លាំងឡើងនៅតាមព្រំដែនក្នុងឆ្នាំនេះ។ បើតាមសារព័ត៌៌មាន KCNA អគ្គសេនាធិការនៃកងទ័ពប្រជាជនកូរ៉េនិយាយនៅក្នុងសេចក្តីថ្លែងការណ៍មួយថា នេះគឺជាការឆ្លើយតបទៅនឹងសមយុទ្ធសង្រ្គាមដែលបានធ្វើឡើងនៅក្នុងប្រទេសកូរ៉េខាងត្បូងដែលកូរ៉៉េខាងជើងហៅថាជា "រដ្ឋអរិភាពចម្បង និងជាសត្រូវដ៏ធំដែលមិនអាចផ្លាស់ប្តូរបាន" ក៏ដូចជាឆ្លើយតបទៅនឹងដំណើរទស្សនកិច្ចជាញឹកញាប់របស់សហរដ្ឋអាមេរិកមកកាន់ឧបទ្វីបនេះ៕